林鄭「不動手」贈許智峯 建制叫好 話郭家麒「敗家發言」算溫和
2018/10/12

【明報專訊】特首林鄭月娥噚日就《2018年施政報告》出席立法會答問大會,其間同唔少民主派議員舌劍唇槍,火花四濺。民主黨許智峯問及香港外國記者會第一副主席馬凱 (Victor Mallet)被拒續工作簽證時,批評林太只係以「慣例」為由耍官腔,「敢做唔敢解釋,非君子所為」。林太就回敬一句,「何謂君子,起碼要求就係動口不動手」,似乎暗示許智峯早前涉及嘅搶手機一事,在場建制派一聽特首呢句即拍掌附和。

公民黨郭家麒就批評「明日大嶼」計劃花費可能多達8000億至1萬億元,相當「敗家」,仲話有市民託佢問林太選擇題:「你可以選擇你係一個敗家嘅特首,抑或其實係一個騙子。」立法會主席梁君彥即刻話兩個詞語都可能有侮辱性,要求郭家麒收番,郭家麒就反駁「你都未畀佢答,佢可能話兩樣都係」。

林鄭月娥最終冇要求收番,只係話對於郭家麒嘅難聽說話「大大話話」聽咗十幾年,郭甚至試過用錢掟佢,呢次算係好溫和。翻查資料,舊年《施政報告》答問大會,郭家麒批評林太用300蚊交通補貼收買人心,衝前話「300蚊你拎番去」,林太當時即刻話對方此舉「有行賄之嫌」。

十大熱門
一周十大