英美名校留學生 暑假返港義教英文
2017/8/18

【明報專訊】30幾個海外名校留學生趁暑假返港,去到農圃道官立小學做義工教英文。有留學生同Emily分享,話義工們都係教書新手,初時面對一班小學生時都有啲不知所措,因為小朋友不時「挑戰」義工嘅底線,有啲頑皮,但義工就可以訓練自己耐性。

一班去英美讀書嘅留學生早年成立慈善組織AccessHK,每年都會舉辦教英文活動。負責籌備今年英文教學活動嘅Amina同Emily講,今年參與嘅留學生主要來自英國院校,包括劍橋、牛津同倫敦政治經濟學院等,義工通常按照自己修讀嘅學科,例如科學、藝術同經濟等,為小朋友設計合適英文課程,仲會加入超級英雄漫畫、音樂美術等元素。

Amina話,今年義工負責教導小二至小五學生嘅英文,話班義工都係教書新手,初時唔太識得同小朋友相處,因為小朋友都有啲頑皮,要出動校長幫手維持秩序,但大家混熟後都可以打成一片。Amina話遲啲仲會同小朋友一齊參加戶外活動,了解貧窮問題。

十大熱門
一周十大