費姓讀「沸」定「秘」? 學者:名從主人
2017/1/7

【明報專訊】名導演費穆女兒、著名歌唱家費明儀離世,近日有不少人討論姓氏「費」嘅讀音。Emily所知,「費」可讀「沸」或「秘」,好多人話如果以姓氏嚟講,費應讀「秘」,但點解唔少後輩都唔會叫費明儀做「秘」老師?

先秦讀「秘」 隋唐起有「沸」讀法

有認識費明儀及其叔父、《大公報》前社長費彝民嘅人都提到,稱呼兩位姓氏時粵語發音都係「沸」。

香港中文大學粵語研究中心主任鄧思穎話,「秘」係上古音,因為先秦時期漢語沒有F音,例如孔子時代,「使費」會讀作「使秘」,但到了隋唐等中古時期,開始出現F音,開始有「沸」嘅讀法。

但鄧思穎認為「名從主人」,讀作「沸」或「秘」,好視乎姓「費」的本人希望外界如何讀其姓氏。

中文大學中國語言及文學系高級講師歐陽偉豪(Ben sir)就同Emily講,姓氏讀音無對錯之分,大部分係約定俗成,亦會隨住時代變遷而更改;而「古無輕唇音」,「沸」係較為現代嘅讀法,相信新一代年輕人都未聽過費字會讀成「秘」。

無論讀法係點,兩位學者都同意,最重要係事先問清楚對方姓氏嘅讀音,最終決定權都係喺本人身上。

十大熱門
一周十大