【Emily】劉桂容上過教育電視 畀囝囝發現

【明報專訊】大家認唔認到左圖相中人係邊個？原來係元朗前區議員、工聯會劉桂容，佢丈夫、荃灣區議員葛兆源噚日喺社交媒體上載教育電視片段，仲係小學生嘅劉桂容喺片中同其他同學參加「乘風航」活動，其中要學生學習萬一船上發生災難要棄船逃生，各人體會不同，劉桂容當時就話「今次跳唔到，下次會努力啲跳」。葛兆源喺facebook話，係囝囝喺班房睇教育電視，一眼就認出媽媽，但老師就唔相信。唔少人留言話基本上劉桂容個樣無變，keep得好好（右圖）。