【明報專訊】唔少動物被遺棄後命運坎坷，好似去年元朗有唐狗女「阿輕」遭主人遺棄後流浪街頭，疑連日來「飢不擇食」，吞咗大量石頭同雜草，搞到骨瘦如柴同腸臟嚴重阻塞，好彩被動物義工發現送往獸醫搶救。經過接近一年，原來阿輕已經搵到新主人喇。關注被遺棄動物嘅團體「毛孩守護者」，星期六、日就會去到大角嘴一個商場舉行有關活動，阿輕屆時亦會以毛守大使身分，同主人Connie一齊現身，Connie屆時會講吓「阿輕」被拯救同康復嘅點滴。
