【Emily】何栢良籲搵「姜B」代言宣傳疫苗 網民:唔搵年輕人偶像曹永廉?
2021/5/5

【明報專訊】政府鼓勵市民打新冠病毒疫苗嘅方法層出不窮,先有食肆員工要打咗針,食肆先可以開夜啲、多啲人一枱,近日又擬要求外傭續約時須打疫苗等;噚日港大感染及傳染病中心總監何栢良出席商台節目,再呼籲市民積極接種疫苗,又建議政府應思考邀請「人氣高」嘅人代言,仲點名當紅偶像、男子組合Mirror成員姜濤,話可以搵佢幫手喺社交平台公開呼籲接種疫苗。

花姐話私下傾過打唔打針 未有結論

消息一出,網民同「姜糖」(姜濤支持者)即刻好緊張,擔心佢打針後會出現面癱、爆血管等副作用。另外,有唔少網民揶揄,「點解唔搵年輕人嘅偶像,曹永廉同蘇永康呀?」

姜濤經理人花姐噚日接受過傳媒訪問,話姜濤父母年紀都大,怕姜B一日接觸好多人,擔心一旦感染會影響到屋企人,因此有同姜濤私下討論過打疫苗,「如果有一隻信得過嘅疫苗係咪要去做呢?但未有結論」。至於姜濤會唔會代言,花姐就話暫時未收到通知。

政府都有就打疫苗做唔少宣傳工作,例如搵TVB拍咗一輯《疫苗快打》,由唔同行業嘅人分享打疫苗嘅好處,噚日播咗第一集;另外又搵咗多名醫生拍咗幾集短片講疫苗資訊,例如講有慢性病、三高、藥物敏感等人可唔可以打疫苗,YouTube上播放嘅觀看次數由5.9萬至35萬不等。

十大熱門
一周十大