【Emily】李梓敬話要舉報掛「光時」旗 黃文萱斥議員都唔係:係走狗咋
2021/2/24

【明報專訊】政府噚日公布修訂《宣誓及聲明條例》、《區議會條例》嘅建議草案,詳列有咩不符合「擁護基本法、效忠特區」嘅負面清單。新民黨成員李梓敬喺facebook話修例生效後,第一個會舉報嘅係沙田第一城區議員黃文萱,話佢夠膽就喺修例生效後喺辦事處繼續擺放「光復香港 時代革命」旗。

黃文萱喺facebook話「等緊國安,未到,係咪喺流浮山同刀手一齊過緊嚟?」黃文萱又揶揄李梓敬連區議員都唔係,只係「隻兩邊舐嘅走狗咋」。

政制及內地事務局噚日公布立例,區議員要宣誓先可「再入閘」做議員。黃文萱話,「放長雙眼睇你點玩」。佢又回應愛國者治港要求,「我唔愛國?我或許比更多建制派都愛國愛港。生於斯長於斯,無去過外國讀書,無屋企人拎外國護照,去過中國幾十個城市旅遊,隨時比立法會主席梁君彥去得多」。佢話近期事件,作為現時從政嘅人可能係一個噩耗,但佢會放長雙眼,堅守價值,要鬥命長喎。

十大熱門
一周十大