【Emily】官媒報有人911恐襲 警方:無情報
2019/9/12

【明報專訊】過去兩日親建制報章報道話有「暴徒」揚言噚日要發動恐襲,話「911必定有重大傷亡」,又話要襲擊黃大仙紀律部隊宿舍,英文官媒亦喺社交媒體報道,拎埋美國911世貿中心遭飛機撞擊嘅圖片。其實Telegram群組早已流傳過呢啲傳言,Emily本住求真精神,噚日再向警方求證真偽,有無跟進有關媒體嘅消息;警方無正面回應事件,但話無具體情報顯示香港可能成為恐襲目標,受恐襲威脅程度仍然維持中度水平。

警方回覆Emily話,佢哋時刻保持警覺同留意國際間恐怖活動趨勢,亦與其他執法機構同情報機關緊密聯繫,交換情報同評估形勢,以作適當調配同戒備。

Emily記起,特首林鄭月娥前日話過去呢一段時間喺網上見到好多傳播中嘅假消息,令人信以為真。佢話特區政府會非常努力提供資訊和事實予以澄清,亦呼籲大家要理性、冷靜看待呢啲消息,唔好受謠言影響。

十大熱門
一周十大