想做科學主任 天文台應徵者地圖點唔出香港
2019/3/22

【明報專訊】天文台近年招兵買馬,以應付不斷增加嘅工作量,上年就一口氣招聘十幾個科學主任,台長岑智明噚日同傳媒茶敘時話,呢輪招聘有逾千人應徵,當中唔少更擁有博士學位,競爭好激烈。台長透露,天文台挑選咗百幾人面試,例牌會測試吓應徵者嘅常識,其中一條題目叫佢哋喺一張無字嘅世界地圖點出香港嘅位置,當中有十幾人唔識!

逾千人應徵 不乏博士

現時天文台約有60名科學主任。岑台長話,呢班應徵者好多都係讀物理及氣象學出身,但若缺乏常識,點應付日常工作?台長透露有一個喺香港修讀氣象學嘅應徵者擁有博士學位,台長問佢點樣量度濕度,應徵者就喺紙上面畫咗兩塊「波板糖」,搞到佢同其他考官都搲晒頭。台長諗住幫吓佢,叫佢寫幾個字,但嗰位高材生都係寫唔出。台長無透露結果,但Emily都估到。

中學生點唔出大嶼位置

Emily記得,天文台多年來都會用無字地圖呢個方法測試應徵者常識,但都係有人唔識。台長又話,前年港科院推出嘅「名師高徒」計劃,挑選咗4名中學生跟台長「跟身」學習,佢透露都用相同方法測試佢哋嘅常識,點知兩人唔知大嶼山喺邊,另外兩人答啱,但其中一人「利申」家住東涌,所以識答,結果令人慨嘆。

十大熱門
一周十大