葉劉拍枱質問官員:你係咪當我哋傻?
2019/1/8

【明報專訊】新民黨立法會議員葉劉淑儀曾經因為領展議題,一度被入稟告誹謗,其後佢支持成立專責委員會,調查領展出售商場事宜,「牙齒印」可以話相當深。本身係行會成員嘅葉太,噚日喺立法會財經事務委員會就毫不留手,批評官員「落閘」、唔准議員問領展,仲拍枱質問官員「你係咪當我哋傻嘅先?」

點解葉太咁大火氣?事緣委員會討論《房地產投資信託基金守則》嘅實施情况,財經事務及庫務局首席助理秘書長鄭嘉慧表明,會議上唔會評論個別個案。葉太一聽到就話對佢言論非常失望,一開始就落閘唔畀議員提特定公司、「就係唔准議員問領展」,質疑官員保護大企業、大財團之心「昭然若揭」,完全唔顧小市民痛苦。

委員會主席張華峰都想調和氣氛,話葉太問答時間已完,不如留番下一輪,仲話官員應該同葉太溝通多啲。葉太就以約咗政府開會為由趕住離開,批評官員「咁嘅態度,開會都冇用啦」。

十大熱門
一周十大