全球首間大富翁館空降太平山 訪客有得入「銀行」執錢
2019/1/8

【明報專訊】「大富翁」呢款經典遊戲,相信陪伴唔少人成長,唔知大家有無諗過可以「走入」遊戲世界,「買地」或者抽吓機會卡、命運卡?全球首間「大富翁夢想世界」主題館會喺今年第3季於山頂廣場開幕,主題館營運總監陳景邦同Emily講,場館賣點之一係訪客有得入「銀行」執錢,雖然只係道具錢,但可以當「真錢」咁,喺場館買飲品小食、或換禮品等。

全個場館佔地2萬呎,充滿大富翁特色,會將銀行、水務局、監獄、地契卡、機會卡、命運卡等經典遊戲元素立體呈現,仲有擴增實境(AR)同4D影像互動體驗,具體細節稍後公布。

幫手捉賊 「執錢」可買小食禮品

陳景邦介紹,訪客入場會先參觀大富翁嘅大宅,仲要幫手捉賊,事後可以入銀行「執錢」做報酬。

陳景邦話,預料每年有70萬至80萬人次入場,又話希望除咗遊客,會有多啲本地客「打卡」,佈置亦會融入本地特色,但暫時未講得,「要保持神秘感」。至於入場費幾多,陳景邦話「會係大眾接受到嘅價錢」,大約每人300蚊以下,「但絕對物超所值」。佢話會考慮推出港人及學生優惠,又透露場館會喺今年6至7月試業,8至9月正式開幕。

十大熱門
一周十大