冀聆聽年輕人 拉近兩代距離 梁美芬嫌游蕙禎唔夠後生

2016/1/12

【明報專訊】梁美芬（Priscilla）上年區選喺黃埔東迎戰年僅24歲嘅青年新政游蕙禎，喺對方強勁嘅網絡宣傳攻勢之下，最終力保不失守住議席。梁美芬噚日同傳媒茶敘時話，自己都知道上一代人同年輕人嘅諗法好唔同，為咗聆聽多啲新一代嘅聲音，近排積極學用facebook等社交媒體，想拉近兩代嘅距離。咁會唔會效法佢嘅年輕對手游蕙禎呢？55歲嘅Priscilla就講笑，嫌游蕙禎唔夠後生，自己嘅學習對象係17、18歲嘅後生仔女。