黎耀祥不求名利追求安穩 陳豪仔細老婆嫩繼續搏殺
2020/8/2

【明報專訊】兩大視帝黎耀祥、陳豪繼《法外風雲》後,相隔7年再聯手合演劇集《殺手》,擦出不一樣的火花。劇中黎耀祥是過氣殺手閻武,潦倒市井;陳豪則是型英帥、風流倜儻的殺手界明星Zero,形成強烈反差。劇情發展至尾聲,閻武被激發重振昔日「殺手之王」雄風,黎耀祥配合角色轉變,下苦功操出6嚿腹肌,以弗爆狀態跟陳豪上演「終極一戰」!戲外黎耀祥與陳豪擁有幸福家庭,事業亦是豐收期,他們同樣覺得對名利追求已是其次,最重要生活安穩,可以挑戰更多新角色。

《殺手》閻武一角,為黎耀祥(祥仔)的演戲生涯帶上新衝擊,嘗到在熒幕前與女角演火辣親熱戲,又打戲連場,他笑言應該只此一次。監製陳維冠(Joe)曾笑說祥仔是飲醉酒下答應演出,祥仔笑說:「那次Joe約我同兩個編審出來傾,我就帶了3支酒,點知兩個編審同我老婆都唔飲酒,得我同Joe飲,我飲到醉晒,上車老婆話我應承咗拍,我話無呀,哈哈!Joe做監製之後我哋未合作過,今次角色同劇種都係新嘗試。」

首集祥仔就同女演員有火辣親熱戲,陳豪說:「祥哥拍親熱戲真係好少見。」祥仔亦說演戲以來真的未做過,他問陳豪:「你都間唔中有啦!」陳豪說:「曾幾何時都有啲膨膨聲嘅!𠵱家少啲,電視尺度有限,不過祥哥做就迴響特別大。」

祥仔靠陳豪操出6嚿腹肌

祥仔為角色操出6嚿腹肌,他感激陳豪做軍師傳授操肌心得,「劇情講我由一個有肚腩的肥佬減磅操弗,不是要求好大隻,阿Mo(陳豪)教我點樣計卡路里,100克牛扒有幾多,當時用了個多月已經減到」。原本Joe沒要求祥仔除衫騷肌,但他認為配合劇情,展示成果可以增加畫面效果,「可能Joe覺得我操唔到,無諗過我會有決心操出成績。始終我拍嗰時都50幾歲,Joe可能諗,都呃我拍咁多打戲,如果再要求除衫,好似不近人情。我覺得劇本寫到咁,不如做盡啲,畀大家睇埋成個過程。係角色好大轉變,好過得個講字,著件貼身衫縮肚就當做咗,唔想浪費大家的心血」。陳豪認同:「難得有咁好機會,祥哥要試吓show body!我講咗個方法,最緊要是他有決心同堅持,真的不容易。」

陳豪自《誇世代》後,一直持續操弗,他現在着重營養方面,「我堅持鍛煉體能,特別是心肺健康好重要。始終年紀開始大,我哋需要幫番自己身體,注意飲食及運動,不要加重心臟負荷」。祥仔今次要應付連場打戲,是他拍戲至今打得最勁一次,「劇中我要打好多爛仔交,又畀人打,算是入行以來最辛苦一部。我拍嗰陣已經同自己講,《殺手》應該係唯一一次喇!我初時以為阿Mo好撈,Chok住冲咖啡,兼只係遠距離開槍,原來他都打得唔少」。祥仔透露劇集尾聲時,他跟陳豪會上演「終極一戰」。

陳豪劇中被設定開咖啡店,自然駕輕就熟,不過他最初有點抗拒,「咖啡是我的愛好,同戲劇放埋一齊不太好,但《殺手》題材較特別,我想了想,覺得沒所謂」。祥仔讚這個設定好成功,好難像陳豪玩那部咖啡機,玩得如此純熟,表現自然似融為一體。

角色不同性格撞出不同火花

《殺手》多名女演員包括李佳芯、江美儀及龔嘉欣都表現出色,陳豪之前跟李佳芯合作《誇世代》,他讚對方處理角色很好,「她的角色性格幾巴渣,婆仔,口齒伶俐,個髮型又爆,有一種好特別嘅氣氛出嚟。龔嘉欣完全變了不似龔嘉欣,用全新形象出現」。祥仔主要跟江美儀有感情戲,他說:「我同江美儀着重感情,描寫兩個低下階層嘅人互相照顧、互相扶持、互相慰藉,我幾鍾意呢段感情,比較貼地,社會好多這些人為口奔馳,兩個人互相理解,感覺好真實。今次每個角色性格都好鮮明,不同性格撞出來有不同火花,感覺好得意。」

陳豪:慶幸事業穩定時結婚生仔

祥仔與陳豪事業、家庭都美滿,還有什麼想追求?陳豪說:「安穩、開心、平安。」祥仔認同:「keep住平平穩穩的生活、身體健康,已經好幸福。」陳豪與老婆陳茵媺(Aimee)結婚7年甜蜜恩愛,3名子女乖巧,陳豪不論工作如何忙碌,都會爭取時間家庭樂。他慶幸在事業穩定時結婚組織家庭及生小朋友,「現在可以放多些時間在小朋友身上,教育方面可以向身邊有經驗的人學習,不用行太多冤枉路。仔女都好乖,個個性格不一樣,是人生奇妙之處,最重要教導他們正確價值觀」。

祥仔:做得開心就滿足

祥仔兒子22歲正於美國讀大學,明年畢業。他說:「他大學畢業,我的責任已完。之後他的人生路點行,要由他自己去建立,不需要我哋幫助太多,是另一個階段開始。正如我之前講,現在生活平穩已經好好,不會要求搵幾多錢、攞咩獎,或者要到荷李活發展,我都唔覺得好重要。其實亦因為我哋走過來這條路,到今時今日有這樣的成績,已經不容易。娛樂圈一浪接一浪,我見到好多前輩走嘅走、退休嘅退休、失意嘅失意,就會覺得現在自己能夠去到一個安穩嘅位置,已經好難得。仔又大,生活又穩定,最大理想是保持住。有適合角色,觀眾鍾意睇,睇得開心,我又做得開心就滿足了。」陳豪的子女年紀還小,仍要繼續搏殺,希望挑戰更多新角色,「我一向想試多些不同新鮮的角色同劇種,讓觀眾有不同選擇」。祥仔說:「作為演員需要新刺激,有新題材帶來更大衝擊,可以撞出新火花,是互動,《殺手》是好新鮮的經驗。」

場地提供:香港瑰麗酒店

記者:葉靜文

攝影:劉永銳

■更多娛樂猛料 ﹕ol.mingpao.com

十大熱門
一周十大