【明報專訊】第20屆上海電影節前晚正式開幕，多部華語電影排住隊登場，古天樂、佘詩曼、薛凱琪、陳偉霆、周迅、霍建華等齊齊參與盛事，星光熠熠。一向多產的古仔參與多部電影演出，走紅地氈幾乎分身不暇，完成《殺破狼‧貪狼》後就馬不停蹄趕到《常在你左右》的劇組，認真威水。
古仔扶實阿佘
古仔今次跟佘詩曼、張智霖（ChiLam）、蔡卓妍（阿Sa）等拍攝港產驚慄片《常在你左右》，不過今次「初哥哥」同「君好」不是一對，阿佘再拍古仔曬恩愛，兩人在紅地氈上，阿佘以性感露肩魚尾裙示人，愛靚不要命，魚尾設計令她舉步維艱，古仔見狀即時充當人肉扶手，緊緊扶實阿佘齊齊行上樓梯級，阿佘笑言：「我覺得自己好似一條八爪魚，全程吸住個地走不動。」一眾演員將紅酒倒入特設的冰棺，血紅色呈現「萬聖節見」四個字，正式公布電影將於10月萬聖節上映。
戲中，ChiLam跟阿Sa同樣是膽量大挑戰，ChiLam說：「平時連劏雞都不會做，今次要將林家棟條屍肢解，個感覺好特別，不過今次導演是《人肉叉燒包》的邱禮濤，肢解感覺是例行公事。」而阿Sa一向怕鬼，以往睇《陰陽路》系列鬼片都好驚，正煩惱到時候如何入場支持自己的電影。
