關心妍拒用福音碟掙錢 怕變商業化 以真名關惠文炮製新歌 (18:32)

文章日期:2023年03月20日

關心妍(Jade)日前接受由許文軒主持的《StarTalk》訪問,Jade即將舉行慈善福音演唱會,她說:「相隔唔夠一年再喺紅館開騷,自己都估唔到,今次係用自己嘅『妍亮生命慈善基金』入紙申請紅館,個唱係以福音歌曲為主,其實福音歌曲係愛嘅傳遞,有洗滌心靈嘅作用,自己好希望用呢個主題去做。

要明買明賣,講清楚畀大家知,入到場未必有你哋想聽嘅慘情歌,但都會演繹一啲流行歌曲。今次會請自己好欣賞以及有共同信仰嘅歌手擔任嘉賓,但係我唔想變咗個雜錦演唱會,唔想每位嘉賓一人唱一首。我想每位嘉賓嚟到都有意思,每人喺每一Part都代表人生遇到嘅一啲問題,大家聽完之後可以得到啟發。」

談到久未推出福音唱片時,Jade說:「2009年出過一隻福音碟,當時係因為喺伊館開騷幫正生書院籌款,之後一路未有再做,係因為我唔想用福音碟掙錢,唔想變成商業,想等到一個合適嘅機會先至再做。

直至自己有咗慈善基金,覺得需要有一啲洗滌心靈同正面嘅歌,於是呢幾年慢慢開始製作,其實已經錄好咗幾首歌,但係一路都冇出到,亦冇諗過用呢啲歌派台,諗住做好晒先慢慢出,但撞啱今次開演唱會,所以就用咗其中一首歌曲《再見關惠文》,變成自己今次主題曲。首歌好有意思,因為關惠文係自己嘅真名!」

(即時娛樂)