陳自瑤自封「慳妹」接棒第2場帶貨 為電商直播獻出3個第一次 (15:29)

文章日期:2023年03月20日

早前曾志偉領軍的《獎門人》3度伙拍「鄰住買」推出感謝祭,而TVB附屬公司TVBC淘寶,早前亦達成合作意向,年內將共同發展48場電商直播;而為電商直播打響頭炮的陳豪與陳敏之,二人長達6小時的直播全場銷售額突破2350萬人民幣(約2646萬港元),成績斐然。

今個月30日將進行第2次跨境電商直播,參與藝人暫定落實有《識貨》首屆冠軍陳自瑤(Yoyo),另一位藝人身分將於稍後公布。是次直播內容主題圍繞無綫經典劇集,將內容結合到電商直播平台,利用TVB擁有的龐大IP庫,為用戶創造耳熟能詳直播場景及主題。

對於接「雙陳」陳豪及陳敏之棒,成為第二次電商直播帶貨主持,Yoyo心情緊張又興奮,並謂自己為該個電商直播獻出了多個第一次:「我未試過正式真係做一個咁大型嘅直播帶貨Show,仲要係淘寶咁大嘅平台,所以都好緊張,對自己嚟講都係好大嘅挑戰。」

向來做事認真的Yoyo,為了將最好及最抵買的貨品推介給受眾,更會花大量時間做事前準備:「因為都好多貨品需要去了解佢嘅用途、成分同其他所有嘢。今次挑戰6小時直播帶貨,都係人生從未做過嘅嘢。」Yoyo又指自己平時絕不胡亂將貨品推介給朋友:「我不嬲做嘢比較謹慎啲同實際啲,所以我介紹親畀朋友嘅嘢,係真心覺得好用先至會介紹。所以如果我做帶貨活動,我都真係想推介一啲真係真心好用嘅好嘢畀大家。」

問到Yoyo私下是否精明消費者,她笑稱自己其實是慳妹一名,言談間盡顯精打細算一面:「本身我係慳妹性格,我買嘢多數會格價,睇下邊度啲嘢平啲、品質好啲,亦都會睇吓網上面啲Comment。」再問是否「講價」達人,她則笑謂:「我有時買嘢都會盡量揀啲性價比高,又平又抵又高品質嘅貨品;講價方面,如果講到價嘅地方我都會盡量講嘅。」

(即時娛樂)