論盡教育:香港家長的心態

文章日期:2021年06月29日

【明報專訊】碰到多年不見的同校但低幾班的同學,好自然聊起兒女,不講還可,一講起淚漣漣。她的幼女在港島一直資女校讀中一,辛苦到爆燈,返學似食黄連,做功課似受絞刑,做媽媽的當然心痛,但又不知如何處理。

天下父母心,希望兒女讀書聰明,入讀名校,將來順利考入大學。小婦人經常聽到牛頭角的街坊教仔:「畀心機讀書,咪好似老竇咁,盲字都唔識多個,做份牛工,日曬雨淋,搵雞碎咁多錢。」又確實睇到好多下一代爭氣,有啲入大學脫貧,有啲做生意仔創業成功。王師奶覺得一般低下層的家長似乎無咁煩惱,草根階層的兒童似乎讀書無咁大壓力。每晚黃昏,公眾籃球場和足球場都好多小朋友、中朋友玩得好熱鬧,唔通佢哋唔使讀書和做功課?

直資可選教學語言惹亂局

資助中學開英文班有限制,規定幾多band 1學生才可以成班,呢個限制王師奶一向都唔贊成,雖然唔贊成,也非全無「可取」。直資選擇教學語言的特權破壞了公平,產生亂局,間接將僅有的「可取」掃得一乾二淨。入唔到英語班唔係問題,只要肯交學費讀直資,你一定有英語班讀,同是這一個學生,交錢就可以讀乜都得,唔交錢就無得傾,呢啲係乜制度呀?直資學校的校長和教師們,小婦人批評的是制度的偏差,制度是官老爺定的,與你們無關。家長一切全憑直覺,每年大學入學率確實傳統名校最高,什麼9科、10科5**都大多來自這些學校,這些學校都是英語授課,家長們好自然覺得英文好是入大學的重要條件,因此不論子女程度是否適宜,千辛萬苦都要搵一間英語授課的學校。

王師奶教兒女,重複最多的話是:「做人做事最緊要量力而為,無咁大個頭唔好戴咁大頂帽,荷包只得幾十蚊,唔好行入連卡佛。」香港一般家長,兩眼發光望住「英文班」這三個字,唔理個仔個頭嘅size,係都要佢戴奇連伊士活嗰頂墨西哥大帽,一陣微風都吹咗頂帽去街尾喇!香港的資助小學以中文為主,所有課本都以中文編寫,英文只是其中一科;到升中一,如果入英文班,啱啱掉番轉,全部英文課本,密麻麻,粒粒都係生字,媽媽咪呀!查字典都查到頭昏眼花,上堂時阿sir同miss講的是外星語言。小六同中一呢個gap闊過維多利亞港,亦係好多學生讀書失敗的原因。中一唔掂,中五都一定唔掂,偶然會有三幾個半路中途突然開竅,跟番大隊,但比例唔多。

盼教界正視語文鴻溝 家長量力而為

這位媽媽跟着講學校好多功課,連普通話都要抄100個詞的拼音,點抄呀?唯有媽媽出馬抄埋一份,個女愈做愈慢,哭哭啼啼。用上斷頭台等絞刑去形容略嫌誇張,此情此景,孰令致之?不自量力囉,袋住50蚊入連卡佛囉!講完家長學生,講吓學校,有些學校,尤其是有名氣的傳統名校,不愁學生,常犯店大欺客的毛病,學校是一言堂,所有措施不容「阿趦阿趄」,唔鍾意請去別家。教師也有好多款,王師奶相信大多都是敬業樂業,愛護學生的好教師,難保其中也有一些以身在名校任教飄飄然而失去方向的。

王師奶懇請教育界正視小學和中學(小六和中一)語文的鴻溝該如何收窄或填補,不要太早放棄數以萬計年輕學子;呼籲家長們一切量力而為,要因應子女的能力和興趣陪伴上路。記住:强扭的瓜不甜。

文:王師奶

作者簡介﹕不是普通師奶,家中米缸有幾多斤唔知,但對香港教育界有幾多牛鬼蛇神,有幾多「嗚喱單刀」措施,卻一清二楚。「論盡教育」絕不手軟。wongszelai@yahoo.com.hk

[Happy PaMa 教得樂 第352期]

相關字詞﹕名人KOL 王師奶 論盡教育 每日明報-Happy Pa Ma

RELATED