公民黨立法會議員楊岳橋（AY）原定今日提出議員議案，辯論檢討單程證政策。不過，勞工界議員潘兆平嘅檢討假期政策議案獲通過後，立法會主席梁君彥以提出動議嘅AY不在席為由，唔處理佢嘅動議，直接宣布休會。
梁君彥宣布唔處理楊岳橋個動議前，當時在席嘅民主派議員區諾軒話，已經起身要求點人數，點知都唔夠梁君彥快。區形容，今次係大家全體責任，唔可以怪任何人。一向關注單程證政策嘅新民主同盟范國威就話感到可惜，因為佢準備修正案都準備咗好耐，未來會考慮再就類似議題提議員動議咁話。
休會之後，AY先落到立法會會議廳附近，唔少建制派議員都圍住佢，民建聯劉國勳話自己準備咗發言，新民黨主席葉劉淑儀就話AY「撻Q」。
AY之後發聲明道歉，承諾日後唔會再犯相同錯誤。佢話嗰陣咁啱係政制及內地事務局長聶德權為《國歌條例草案》舉行記者會，佢抽時間喺立法會辦公室睇記者會電視直播，希望多啲了解以向公眾說明，因而錯過動議時間。佢承認疏忽大意，並向公眾、就議案提交咗修正案嘅議員，同埋準備就議案發言嘅同事，致以最真誠嘅道歉。