香港爆發禽流感搞到要殺雞,Emily見唔少,但爆發豬瘟要殺豬,就真係未見過。近月內地非洲豬瘟愈爆愈勁,雖則暫時未殺入香港,但漁護自然護理署已做準備,仲出動大量粉紅色豬隻毛公仔練習殺豬。
本港活豬業界一直好擔心非洲豬瘟殺入香港,食物及衛生局長陳肇始(Sophia)噚晚喺Facebook話,會嚴防呢個疫症,已喺入口、運輸同屠房加強消毒,本地農場會逐漸停用以動物或其副產品製造嘅動物源性飼料。
萬一非洲豬瘟失驚無神殺入香港,Sophia話政府會果斷應對。噚日朝早,佢去咗漁護署喺打鼓嶺嘅行動中心,視察本地養豬場出現非洲豬瘟嘅部署同演習,包括豬隻銷毀行動。