「汪阿姐」汪明荃近日喺Instagram自創「汪阿tag」新式tag人（標籤）方式，直接手寫紅色大字人名喺張相上面，就當係已經tag咗人，吸引唔少藝人仿傚。估唔到連政制及內地事務局長聶德權，今日喺facebook發帖時都緊貼潮流，用呢種tag人新方法，宣揚關注精神健康。
聶德權話佢早幾日擔任香港神託會「蕉夫＠大埔」活動主禮嘉賓，巧遇佢8年前以社會福利署長身分，探訪神託會沙田精神健康中心「創薈坊」時接待佢嘅男士Alan。佢喺fb放咗當年同今次活動時同Alan嘅合照，跟住就學汪阿姐咁，用紅色字喺相上面寫低「我」同「Alan」，帖文又叫大家可以去佢IG睇更多相。
其實汪明荃「發明」咗紅字tag人之後，唔少藝人好似張敬軒、麥明詩等，都爭相模仿呢個新潮流，連譚小環嘅魚蛋店都喺fb用呢個方法嚟tag佢哋嘅小食。汪阿姐見到咁多人學佢，似乎都好高興，今日再喺IG出post時，仲特登留言話「#我就是ig紅人 #潮流」。