【Emily Online】被問八達通增值下限 劉鳴煒:同我做青年工作有乜影響呢? (13:10)
2018/11/3

政府上年10月推出青年委員自薦計劃,又升格青年發展委員會,以示重視年輕一代聲音嘅決心,但仍然面對不少批評。青年發展委員會副主席劉鳴煒今朝去港台節目《政壇新秀訓練班》,接受青年人提問。有人問到佢如果喺便利店增值八達通要最少幾多錢?劉鳴煒自言有用八達通、有搭港鐵,但承認增值係交畀秘書處理,但反問對方「我識唔識用八達通,與我做唔同嘅青年工作有咩直接影響呢?」佢又覺得對方喺度攻擊佢個人身分。

相關報道:青發委被指難代表青年 劉鳴煒稱關鍵在願意了解和有同理心

節目上唔少青年人同主持都關注到青發委嘅認受性同代表性問題,當劉鳴煒突然被問到八達通增值最低額嗰陣,佢問返對方:「八達通增值點做同幾多錢消費,與政府做青年政策有咩直接關係?」而發問嘅青年人就覺得,如果呢條咁貼地嘅問題都唔知時,又點樣明白年輕一輩面對嘅問題呢? 

不過,劉鳴煒就認為個提問係玩攻擊身分,批評呢種態度係不切實際,又話「認受性你可以永遠都話有問題嘅,不如搵Ocean(提問者)做青年發展委員會副主席可能認受性會高啲嘅」。

另外,政府近年大推粵港澳大灣區,同場有人就問劉鳴煒,當而家香港年輕人都揀容易移民的大學科目嗰陣,如果佢今日考DSE,會唔會揀一啲適合到大灣區工作嘅科目?劉鳴煒就話,因為自細一直對做律師有興趣,同埋讀law對大灣區未有大作用,當地亦唔係行普通法,所以都係唔會啦。

其他報道:疑遭家人揭發無上學 女子自縊亡

其他報道:【垃圾徵費】環境局專款專用助回收塑膠 稱生產廢物須付代價才可推動回收

其他報道:陳肇始料明年初出現流感高峰 強調自願醫保未放棄高風險池

十大熱門
一周十大