新民黨立法會議員容海恩（Eunice）今日與同黨嘅政策總裁袁彌昌（Derek）拉埋天窗，成為立法會第一任任內結婚嘅女議員，一對新人今日下午喺尖沙咀半島酒店擺四圍酒席，宴請親友。
一對新人下午1點出嚟見記者，Emily問新娘子Eunice心情如何，佢話「原來結婚好忙，無諗過有咁多嘢搞」。Emily追問係咪因為籌備得太急所以趕，Eunice答，「唔係，我諗人人結婚都要安排好多嘢，例如賓客同場地」；至於新郎哥Derek就大讚老婆係佢「perfect choice」。
立法會議員麥美娟係Eunice伴娘，佢話伴娘團有5人，主要係Eunice大學同學、朋友，又話大家都錫住Derek，「玩新郎」嗰陣只係叫佢做掌上壓食生果，「香蕉同提子都唔少得啦」，笑言「做咗幾下就放過佢」。
至於其他賓客，大約喺11點到12點到現身，容媽媽話「非常滿意女婿，畀101分」。而政界中人方面，當然唔少得新民黨主席葉劉淑儀同副主席潘國山。
Emily問葉太對新人有乜祝福，葉太答「祝佢哋早生貴子囉」，又話送咗銀行禮券比一對新人，等佢哋決定買咩心水。