前電台主持人、人稱「炸兩俠」嘅陳雲海（雲海），尋日喺社交網站Facebook發表帖文，表示自己「人已倒下！暫别Facebook」，引起網民不少關注。今日雲海再度發帖闡述事件，表示自己因中風，而家入住政府醫院，並宣布「炸兩俠退休了」。
雲海喺帖文中，講到「我而家留醫期間，暫時間內也不能出醫！事源我中風，情況有些地方好，有些地方不好！現在有政府醫院最專業團隊照顧著我，也感謝他們，明天見腦科醫生！在此正式宣佈：炸兩俠退休了！而若果有什麼事情，向大家先講聲『再見』」，帖文最後亦提到其網台節目「格羅兹尼」已在入院前錄好，又感言「人生無常！面對命運」。
提到雲海，大家耳熟能詳嘅除咗談論外星人外，佢經常喺Facebook以「炸兩俠」名義就唔同事件發聲，與有關部門據理力爭等，更備受唔少網民認同。因此帖文發出後，網民紛紛留言祝福雲海早日康復，例如「身體緊要，好好保重」、「快快好返就是了，謝謝你的正義感」、「祝早日康復，期待炸兩俠重出江湖」。