即時港聞

【Emily Online@禮賓府】林生招呼賓客頻被集郵 罵林太捱夜「黐線」? 笑言自己瞓到「懵懵哋」 (13:46)

今日禮賓府舉行勳銜頒授典禮,之後一眾受勳人士偕賓客到花園寒暄。禮賓府主人、特首林鄭月娥理所當然成為最受歡迎嘅集郵對象,而佢丈夫林兆波亦不相伯仲,喺花園招呼賓客期間,都密密被人邀請合照,盡顯主人家風範。

其他報道:林鄭稱為市民排憂解困獲滿足感 措施理念源自社署署長經歷

林生今日仍然着住「白襪仔」現身,一貫簡樸打扮。之前林太喺電台話自己忙於寫施政報告嗰排,成日凌晨兩點幾都未瞓,被林生鬧佢「黐線㗎」。林生今日直認有呢件事,可能當時自己係瞓到「懵懵哋」,見到太太仲未瞓,於是就同太太講咗句「唔好咁黐啦」。咁而家林太係咪仲咁夜瞓?林生就話係睇階段,前排趕施政報告就嚴重啲。

前嗰排林太病咗,出席活動發言時間唔中都有兩聲咳。林生就話,林太而家仲有啲咳,但唔使食藥,不過就有中醫湯水調理下。佢又話,林太一直都咁捱,所以佢心痛咗好耐,平時會同太太傾下偈。

林生同記者傾完偈之後,有記者拜託林生搵埋林太埋咪兜見記者,林生好盡力咁喺花園行咗一個圈,可惜林太已經入咗室內。而林生就唔肯獨自埋咪兜見記者,拍拍心口話自己會緊張。

其他報道:港台:特首辦關注曾俊華節目 特首辦:離職後工作須申報 曾強調非受薪質疑節目宣傳被暫停

其他報道:【多圖】王家衛奪法國盧米埃爾大獎 香港第一人 邱騰華祝賀

相關字詞﹕禮賓府 授勳 林鄭月娥 林兆波 集郵 編輯推介

上 / 下一篇新聞