愛貓、愛狗、愛寵物嘅市民爭取多年嘅寵物巴士路線終於露出曙光喇！九巴書面回覆立法會議員劉國勳查詢時终於「開綠燈」，話對於喺假日開設寵物巴士路線持開放態度，並願意探討畀乘客帶同指定類別同大小嘅動物，喺乘客合理地看管下一齊上車嘅可行性，較以往取態積極好多。
其他報道：仁愛堂劉皇發夫人小學教師涉強拖學生 教育局指校方設專組調查
不過，根據目前《公共巴士服務規例》第10(2)(C)條規定，除咗陪同失明人士坐車嘅導盲犬外，乘客唔可以攜帶雀鳥、寵物或其他動物上車。九巴話，基於法例上嘅限制，要開辦寵物巴士路線必須克服一啲限制，包括法例可唔可以放寬攜帶寵物上車、對寵物要有清晰嘅界定，以及唔會對其他乘客帶來不便或者對巴士嘅車務運作造成影響。九巴話會就開辦寵物巴士路線嘅構思，同運輸署保持緊密溝通及做可行性研究。
劉國勳歡迎九巴就開辦寵物巴士路線「開綠燈」，之後會繼續喺立法會跟進事件，包括要求運輸署修例，放寬乘客攜帶寵物坐專營巴士同港鐵嘅限制，仲會同九巴繼續開會商討寵物巴士路線嘅設計、攜帶寵物類別同大小等細節。