教育局長吳克儉原定星期日下午搭國泰航空班機去英國外訪，點知飛機起飛後，擋風玻璃出現裂痕，為咗全乘人員安全，飛機要折返香港機場，好在事件中無人受傷，國泰亦調配另一班客機，喺今日凌晨1點再向英國出發。
其他報道：任期餘個多月仍外訪？ 吳克儉：需平衡外訪及本地政策工作
國泰發言話，噚日下晝2點39分由香港出發去英國倫敦嘅CX253航班載有270名乘客，因為機長前方擋風玻璃出現裂痕，所以要按既定預防措施折返香港。該班波音777-300ER客機噚晚8點46分安全降落香港國際機場。國泰已經調配另一客機同機組人員再次啟程，預計航班會喺今日凌晨1點再出發。
國泰又話，為乘客喺候機大堂安排膳食，對乘客帶來不便致歉。機管局就表示，噚晚約8點收到控制塔通知，話CX253航班中途需要折返同局部戒備，航班最終安全降落，機場運作無受到影響。
吳克儉今次去倫敦，係出席英國文化協會舉辦嘅全球國際教育論壇「Going Global 2017」，同埋探訪當地大學等，同行嘅仲有政務助理余健強及政治助理施俊輝。