特首選戰落幕超過1個月，「薯片叔叔」曾俊華繼續喺個人facebook同香港人拍住上，今日就上載咗自己返母校喇沙書院慶祝生日嘅2張相，除咗一貫吸Like外，唔少網民亦大讚「曾sir揸劍好型」、又呼籲佢放下包袱，開心享受人生，「薯片叔叔， 盡情吧！」
【短片：Emily Online】3位「JT」世紀合唱 薯片Ｘ主席Ｘ田少合唱《沉默是金》
上周五度過咗66歲生日嘅「薯片叔叔」，今日喺fb上載同囝囝曾雕龍一齊返母校喇沙書院，同一眾師弟慶祝生日嘅合照，仲留言話，覺得喺喇沙呢個大家庭慶祝好幸福，因為可以同認識多年嘅老朋友相聚，而且大家有共同興趣及價值觀。
廣告都有話，再鋒利嘅刀都會有生銹嘅一日，不過曾經形容自己「幾打得」嘅曾俊華，喺喇沙教劍真係「32年如一日」，自1985年教喇沙校隊嘅佢，拎起劍依然有型有款，上載教劍嘅相贏盡網民掌聲，咁又係嘅，因為「薯片叔叔」曾經話過，劍隊工作除咗令佢維持運動習慣，仲係佢工作以外最重要嘅心靈寄託之一嘛！