特首梁振英（CY）今日落區，朝早去天水圍家訪，中午到元朗食雲吞麵，仲同唔少市民合照傾計，CY傍晚就以「繼續走走，聽聽、看看」為題，喺個人facebook「開心Share」相關圖文，話「基層市民有安穩生活，安心培育下一代，香港就有希望」。
其他報道：民主黨尹兆堅入境澳門被拒原船返港 3年來第二次被遣返
CY話，5年前自己競選期間，曾經喺天水圍出席論壇，會見大批市民，「離開時有位街坊陪我行了5分鐘到我上車的地方」又叫佢當選之後，唔好忘記天水圍。CY就話，自己「一直經常去天水圍」，仲為天水圍中學同學每年籌辦暑期就業計劃，「讓基層的孩子也有機會增長見聞，建立自信」。
由上載嘅相片所見，CY今日都同唔少街坊自拍合照，朝早喺天水圍探甄太一家，CY話，甄太老公因為組織義工活動今朝不在家，大兒子則喺北京讀大學，小兒子讀中三，「本屆政府不斷推出支援基層的新政策，五年來，政府福利開支增加71%」，CY指「甄太一家也是受惠者」，「但基層市民仍然自力更生，這種精神我十分敬佩」。
另外，CY中午去元朗市一家老字號麵家食雲吞麵，形容「麵家字號老，但科技新，用手機落單」，食麵後，佢仲得閒逛商店街市，同一大班街坊自拍合照，買埋傳統小食同糕點先走。