民主思路今晚喺培正小學舉行特首選舉論壇，兩名特首候選人林鄭月娥同胡國興出席，首次有機會同場互相辯論。胡國興喺答主持湯家驊提問時話，認為自己曾經講過林太係「比梁振英更梁振英」只係講事實。林太隨即就反擊，話自己未宣布從未聽過「梁振英2.0」呢個稱呼，強調「我同梁先生完全唔同」，「佢係男人我係女人」，更加話自己「從來無喺私營機構工作」添，似乎意有所指，現場觀眾聽到都一度起哄。
其他報道：【選舉論壇】被質疑言辭偏激無助修補社會 胡國興：可能你（湯家驊）提議嘅中間落墨就冇人信，我提議嘅就唔同
湯家驊又問林太，提名佢嘅選委一個民主派都無，問佢未上場已經好似特首梁振英咁，同民主派關係去到谷底，問佢點樣修補關係。林太就話，「選舉係選舉，管治係管治」，佢話喺佢做政務司長時期，唔少泛民如果遇到棘手問題，都會諗到搵佢，又話泛民每年杯葛行政長官嘅施政報告，但仍然願意就某啲政策同佢傾，即使辭咗職之後，都有個別民主派搵佢講政策。
林太話，唔覺得同民主派關係有急劇變化，認為有啲選委係有選舉、配票策略，「選舉有選舉嘅行為」，仲話好似胡官咁，都示範緊「比較激」嘅策略咁話。