上個月被取消立法會議員資格嘅青年新政梁頌恆同游蕙禎,今日朝早去到高等法院門口外面開記者會,宣布將會向終審法院上訴。不過附近突然出現咗幾個中年「大媽」,好大聲咁鬧佢哋係「漢奸」、「賣國賊」,又話「無共產黨你哋今日邊有得企喺呢度?你邊到有水飲?」佢哋又粗口橫飛,同不斷講一啲涉及性侮辱嘅說話,持續咁鬧咗梁、游20幾分鐘。
其他報道:【宣誓覆核】指限期前申上訴至終院 游蕙禎:抗爭活動勢必回到街頭
在場記者雖然有備而來,一早將支咪放喺梁、游前面收音,但聽到嘅都只係「大媽」們的叫喊聲,梁、游嘅說話就畀聲浪掩蓋,結果Emily啲行家個個都叫苦連天。
據Emily喺現場觀察所得,高等法院正門外面10幾米本身有一個示威區,平時啲示威者都喺嗰到叫口號,過往一直相安無事。但今次幾個「大媽」無留喺示威區,反而就行咗去記者附近,不斷咁鬧梁、游兩人。Emily嘅行家忍唔住向現場嘅警察投訴,問點解唔叫啲示威者去番示威區,但警察就話:「你都知呢到咩環境」。
採訪完咗之後,Emily同一班行家就搵咗現場嘅警官交涉,嗰位警官就話曾經「建議」示威者去示威區,但對方無理佢。一眾行家就追問點解唔採取行動,驅趕示威者去示威區,警官就話自己無權強迫他們去示威區,亦無權採取行動,「佢哋(示威者)唔郁,我哋都唔可以控制到」。