民主派近日雖然持續受打壓,但亦有喜事沖吓喜。《蘋果日報》報道,社民連立法會前議員梁國雄(長毛)同該黨副秘書長陳寶瑩,已經入紙申請結婚,二人同為63歲再婚。Emily打過電話想恭喜長毛,但未講嘢佢已經表示「我冇嘢講,byebye」,並未透露更多詳情。
雖然長毛唔回應,但唔少民主派都有恭喜佢哋,工黨何秀蘭形容係「亂世姻緣,經得起風雨」,會計界立法會前議員梁繼昌都隨即喺Facebook表示「恭喜長毛」!
陳寶瑩曾任長毛助理,社民連網站簡介佢為「社運及婦運人士」、「政策研究幹事」。佢曾因2014年嘅佔旺藐視法庭案被判緩刑;早前被指違反限聚令,被警方發出傳票,但佢否認控罪,案件將於3月開審。長毛就有多宗案件在身,除咗早前因參加初選被捕、話佢涉顛覆國家政權外,佢亦因2019年8月18日涉嫌組織「流水式集會」,被控組織及參與未經批准集結等罪。
另外,早前亦有傳媒報道,荃灣區議員岑敖暉同Now新聞台前主播余思朗入紙結婚。