舊年反修例運動下無咗除夕倒數煙花，今年新型冠狀病毒疫情下國慶無煙花，雖然未知年底咩環境，但旅發局嘅秋冬計劃暫時無叫停，總幹事程鼎一話，繽紛冬日節同除夕煙花倒數會繼續籌備，希望搞得成。
家陣世界各地嘅人都無得旅行，為保持香港曝光率，旅發局整咗條VR360片段，下個月推出，航拍香港嘅青山、綠水同田野，仲可以畀人360度調校角度，例如可以從山頂望落山腳，又可以由山腳望番上山頂，鍾意點睇都得，等外國旅客無得嚟香港都可以睇吓片。
除咗吸引旅客，旅發局亦鼓勵港人遊香港，程鼎一提議「既然無法去旅行，不如自救」。佢話等待疫情回穩，政府放寬限聚令至二三十人，將會推「賞你遊香港」，港人消費滿指定金額，初步構思可憑800至1000元單據，換約4小時本地遊，包一餐同交通，設1萬個名額，可以揀約50個行程，包括三級歷史建築「F11 Foto Museum」、大澳蝦膏工場等。
政府同唔同地方傾緊旅遊氣泡同健康碼，程鼎一估計大灣區較快開到，旅發局會就此推廣，以商務旅客及年輕客為目標，配合推優惠，並強調本港衛生安全，正構思衛生防疫指引畀旅遊、零售、餐飲業，以便旅客辨識，等旅客放心。
其他報道：竹篙灣迪士尼毗鄰二期用地認購權不獲延期 政府倡集中發展現有園區