反修例風波引發連場衝突,令警方與傳媒關係緊張。今日(22日)喺沙田示威衝突,有「ATV亞視數碼媒體」記者喺新城市廣場外採訪,其間被速龍警員要求出示記者證,結果換來一句「亞洲電視?執咗啦喎」,記者叫番阿sir:「你上網睇啦,依家有直播睇㗎,亞洲電視數碼媒體呀。」
「ATV亞視數碼媒體」夜晚7點喺facebook出post話,速龍sir聽到記者嘅回答後「可能太忙,頭也不回走了」,不過佢哋「會繼續努力,做好報道」。
據「ATV亞視數碼媒體」官網同facebook專頁,佢嘅前身係亞洲電視,依家以OTT(Over-The-Top)網絡電視方式營運,專責節目製作同世界各地媒體合作業務,提供各類本地、亞洲同國際節目。