反修例爭議仲未平息,特首林鄭月娥有意構建「對話平台」,聽日會聽前運輸及房屋局前局長張炳良、教大校長張仁良等見面問下個平台應該點搞。身兼行會成員嘅新民黨主席葉劉淑儀之前喺電台上公開獻計,建議林太「快閃落區」。新民黨屯門區議員甘文鋒今日喺facebook上載一張佢同葉太「孖頭」嘅橫額,上面寫有「要求特首落區 正面回應訴求」,甘文鋒話其實特首想面對面溝通聽意見,落區就可以做到,平台一直喺度,又話「何必花時間揾咁多長者重新搞個溝通平台。」
至於點先為之「正面回應訴求」,甘文鋒同Emily講訴求係兩邊都有,唔止係回應一邊,而回應係要有互動,唔係記者會咁由上而下宣布。佢認為,回應唔係單單答「做」或「唔做」,應該提供埋解釋。佢提到林太話「既有機制做」,但林太應該要交代如果現行機制達唔到市民期望,會點樣進一步跟進,同幾時跟進等。