取消強積金對冲個議題都爭議咗好耐，立法會財委會今日討論勞工處開設一個首席勞工事務主任常額職位，專責處理對冲事宜時，各黨派議員都忍唔住抽水，拎返特首林鄭月娥話議員支持上調長者綜援年齡單嘢出嚟講。
工聯會何啟明就話，呢兩日成日講「魔鬼在細節」，如果冇一個專門、熟悉嘅官員去講解取消對冲，落實之時分分鐘會出現問題。民主黨胡志偉都「戴頭盔」，講明就算佢贊成設常額職位，但係唔代表大家完全認同方案，叫勞福局副局長徐英偉「唔好好學唔學，學林鄭」，過咗就當大家支持。項目最終以35票贊成、5票反對、2票棄權獲通過。
審議項目期間，自由黨黨魁鍾國斌一度提出中止待續，話若果批出呢個常額職位，會唔會變咗等同支持政府嘅取消對冲終極方案？結果中止待續以7票贊成、35票反對、4票棄權被否決。
建築、測量、都市規劃及園境界議員謝偉銓就接力，提出俗稱「37A」嘅臨時動議，要求將常額職位改為編外職位，獲批准辯論，令民主派議員非常感慨。議會陣線區諾軒強調，議會應該尊重發言權利，臨時動議都應該容許發言，最終臨時動議以18票贊成、15票反對獲通過。不過有關議案並冇約束力，徐英偉講明政府不會撤回項目，但最終都獲通過。