迪士尼樂園近年積極開拓娛樂同酒店相關業務，上年就搵咗台灣天團「五月天」，喺樂園幻想道露天場地開演唱會。Emily知道，迪士尼樂園繼續用呢招，吸引啲後生仔女嚟睇Show兼入樂園玩，今年搵咗27歲當紅英國創作歌手Ed Sheeran，喺4月17同18號嚟樂園開兩場Show，每場大約可容納兩萬樂迷，全部企位，相信現場到時都會好High。
Emily睇返上年「五月天」演唱會做參考，嗰時門票係680蚊至1180蚊，樂園當時仲推出兩日一晚套票連演唱會票，收費4000幾至6000幾蚊。今年Ed Sheeran演唱會應該都會照辦煮碗，睇返佢今年世界巡迴演出中亞洲地區啲門票，票價都係千千聲，以日本大阪站為例，門票就由700幾至1000幾蚊。今次香港站門票啲詳情亦應該會好快公布，聽講門票會分800多元及1200多港元兩款，迪士尼話下周四（17日）公開發售。
其實Ed Sheeran前年個世界巡迴演唱會，原定11月4同5號會嚟香港站，可惜佢踩單車跌斷手，搞到要取消香港、台北、首爾同雅加達等地嘅場次。睇返美國演唱會產業刊物《Pollstar》上年底公布個年終報告，2018年嘅演唱會收入總額打破歷來紀錄，其中又以Ed Sheeran嘅「Divide」巡迴，更加係30年以來所有年度演唱會中收入總額最高、賣出門票亦最多。
相關字詞﹕Ed Sheeren 迪士尼 香港迪士尼 編輯推介