政府上年10月推出青年委員自薦計劃，又升格青年發展委員會，以示重視年輕一代聲音嘅決心，但仍然面對不少批評。青年發展委員會副主席劉鳴煒今朝去港台節目《政壇新秀訓練班》，接受青年人提問。有人問到佢如果喺便利店增值八達通要最少幾多錢？劉鳴煒自言有用八達通、有搭港鐵，但承認增值係交畀秘書處理，但反問對方「我識唔識用八達通，與我做唔同嘅青年工作有咩直接影響呢？」佢又覺得對方喺度攻擊佢個人身分。
相關報道：青發委被指難代表青年 劉鳴煒稱關鍵在願意了解和有同理心
節目上唔少青年人同主持都關注到青發委嘅認受性同代表性問題，當劉鳴煒突然被問到八達通增值最低額嗰陣，佢問返對方：「八達通增值點做同幾多錢消費，與政府做青年政策有咩直接關係？」而發問嘅青年人就覺得，如果呢條咁貼地嘅問題都唔知時，又點樣明白年輕一輩面對嘅問題呢？
不過，劉鳴煒就認為個提問係玩攻擊身分，批評呢種態度係不切實際，又話「認受性你可以永遠都話有問題嘅，不如搵Ocean（提問者）做青年發展委員會副主席可能認受性會高啲嘅」。
另外，政府近年大推粵港澳大灣區，同場有人就問劉鳴煒，當而家香港年輕人都揀容易移民的大學科目嗰陣，如果佢今日考DSE，會唔會揀一啲適合到大灣區工作嘅科目？劉鳴煒就話，因為自細一直對做律師有興趣，同埋讀law對大灣區未有大作用，當地亦唔係行普通法，所以都係唔會啦。