【區議會選舉.Emily Online】曉麗照搞初選 協調見證人指譚香文出爾反爾 (20:25)
2019/8/22

民主派想喺11月區議會選舉搶灘,早排Emily寫過觀塘曉麗區議會選區,「曉麗新動力」張敏峯同「反自動當選運動」成員、黃大仙區議員譚香文助理張隆撞區,張敏峯話上周六(17日)嘅協調會上兩人有共識,25日開居民大會搞初選,但到周二(20日)「反自動當選」團隊就否認。張敏峯今日喺facebook上話,多數居民都認為居民大會應如常舉行,佢WhatsApp聯絡張隆叫佢出席。譚香文就向Emily批評張敏峯逼張隆出席無恥,張隆唔會出席,質疑張敏峯唔係民主派同路人、唔排除係建制派。

其他報道:系統故障致數百網上選民登記申請未獲處理 選舉處籲8.25前聯絡以便區選投票

張敏峯回應話,諗唔通張隆團隊有咩實質證據指控佢係建制派,又話譚香文曾經喺8月10日「反自動當選」嘅記招上,話會讓路畀當區居民出選,而家係空口講白話,繼而又反口,推翻協調共識,毫無誠信。張敏峯表示,「反自動當選」運動有多區撞區,「試問香港人如何能相信『反自動當選運動』是同路人?譚香文的背後的信念是甚麼?」

張隆接受查詢時被問到會否出席居民大會,佢話件事有啲複雜,佢唔回應。譚香文就話,17日當晚佢哋「反自動當選」嘅協調人Tony因病缺席,佢當時已經話要先向團隊匯報,兩日內再將結論通知協調平台,當日無最後共識;然後佢哋收到居民擔心過程會泄漏私隱等問題,所以對初選有保留。至於會唔會繼續協調,譚香文就話「兄弟爬山」。

不過,17日有份見證協調嘅兩個觀塘區議員同Emily講,當日會上已達成共識。區議員黃子健話,當晚已經傾到居民大會嘅細節,包括私隱問題,兩個當事人做咗決定搞初選,認為譚香文嘅講法係完全推翻當時嘅共識。黃子健認為居民大會應該繼續做,張隆唔出席係個人決定,而張隆之前其實有執行共識,宣傳居民大會。

Emily睇番張隆fb,佢喺18日有出post話同張敏峯協調後,雙方一致認同以居民意向決定邊個繼續服務曉麗,所以搞居民大會;到20日就分享咗「反自動當選運動」話對舉行居民大會「有所保留」嘅post。

其他報道:環球時報:英領館職員因嫖妓遭拘留15日 家屬:公道自在人心

其他報道:圖闖機場管制區涉咬傷保安 無業婦稱無法光顧粥麵店會抑鬱求免禁足被拒

十大熱門
一周十大