網上今朝流傳相片,有市民話今朝7點幾,發現西環中聯辦大樓門外支國旗被反轉掛起,拍低照片後上載到互聯網,仲問今日係咪特别日子。Emily同事今朝8點左右趕到中聯辦門外,就見到國旗係正常掛起。
中聯辦中人之後向Emily講,今朝係有見到掛旗錯誤,即刻調查,發現係前線保安人員忙中疏忽出錯,將國旗倒掛咗。中聯辦隨即馬上糾正,上級亦對當事人員嚴肅批評。佢又話,其實事件「沒啥特別」,但中聯辦感謝香港社會各界嘅關心關注,並對今次事件鄭重道歉,今後一定會改進管理,唔畀同類事件再發生。
民主黨羅健熙就喺fb話,「鄭松泰倒插國旗,建制派又譴責又剩;中聯辦倒掛國旗,一句疏忽就冇事收貨喇?你話區旗左右印錯就發現我都仲可以信,你大支旗、咁多粒星,咁都有得疏忽?」
「你堂堂中聯辦喎,政治最正確喎,講自決都變港獨喎,倒掛國旗仲唔係反黨反國家?呢啲嘢都會疏忽?你試吓天安門升旗疏忽畀我睇吖」。