明報APP
即時財經新聞
財經花生︱梁兆基與梁兆基
今日敝報頭版一個全版廣告惹來唔少中環人熱議，話說呢個題為「智醒善行」嘅廣告其實係一篇文章，洋洋灑灑數千字，作者先介紹自己係經濟學家，之後再講自己會考失敗到投身金融業之路，後期筆鋒一轉就去到講行善，非常正能量，而署名係「梁兆基Chris Leung」，well，「經濟學家x梁兆基」，唔少人就會諗起，曾經係匯豐亞太區顧問、現任總商會總裁梁兆基喇!
其實心水清嘅讀者同中環人都知道，總商會總裁梁兆基洋名叫Geroge，而登廣告嘅Chris Leung，就係星展香港經濟研究部首席中國經濟師梁兆基。據聞Geroge今日都收到唔少轉發呢個廣告嘅查詢短訊，不過呢兩位同名同姓嘅經濟學家，相信都唔係第一次被張冠李戴，近期在公忙於谷針、在私忙於出書嘅Geroge都一笑置之。