唔少公司用花紅留住好員工,但用花紅撚化員工,呢家公司可能係首創。據外媒報道,英國鐵路公司West Midlands Trains嘅董事總經理,上月向2500名員工發郵件,話好多謝佢哋疫情下嘅貢獻,每人都會拎到一筆現金花紅,具體嘅細節要撳入條link登記。正當員工滿心歡喜撳入條link,就會發現收到IT部門嘅郵件,話呢個其實一封網絡釣魚郵件測試,換言之,認真你就輸了!
IT部門嘅電郵話,團隊專登將內容設計到好吸引,就係為咗模仿駭客組織嘅手法,等員工毫無懷疑就撳入去。IT部門又強調,員工應該無論何時都唔應該打開可疑鏈接,更唔好交出公司系統嘅登錄資料。
事件喺英國業界引發討論,英國鐵路界工會之一、交通行業人員協會(TSSA)就發文鬧爆,指疫情下前線員工非常辛苦,公司用咁嘅方式玩弄員工感情是完全不可接受。協會話,要求徹查呢條橋係邊個諗,並且要求高層向員工道歉。
其他報道