明報APP
即時財經新聞
【財經花生】金融大會堂搞酒會 租金6萬5
標籤：編輯推介
立法會金融服務界議員張華峰趁住上京前夕同傳媒拜年，席間透露，原來剛剛開幕嘅金融大會堂，一晚租要成六萬五呀！
事緣10個證券協會（加上張華峰），每年都會喺交易所搞春節團拜酒會，今年當然都唔例外啦，定咗喺下星期一。不過喺新場「金融大會堂」搞，就一啲都唔平喇，張議員話多返交接之後，港交所終於肯減價萬五，但都盛惠6.5萬元，想再減啲都唔肯呀，而且價錢仲係唔包搭台。張華峰話比起往年2、3萬租個場，個價升咗成兩倍有多。不過好彩分返10個團體找數，每人俾少少，都無咁肉痛。
之前主席周松崗明明講過，如果係慈善團體租場，或者政府搞吓非商業、推動業界發展嘅活動，租金可商量商量。更何況，個新春酒會，行政長官林鄭月娥、小加自己都會出席，計埋出鏡費，租都應該酌量減減丫。