明報APP
報章內容
滬科創板成交金額少 連深創業板也比不上
標籤：小琴密語
【明報專訊】上海與香港爭國際金融中心已是老生常談，例如港交所（0388）2018年允許同股不同權及未盈利生科股上市，同年11月輪到上海擬成立科創板，被指欲與香港「爭生意」。不過，科創板自2019年6月創板，雖亦吸引唔少H股公司如中芯國際（0981）回A，但現時唔好話同香港爭，連深圳創業板都比唔上。
點解咁講？噚日內地社交平台廣傳一篇分析文章，將前日（13日）科創板同創業板嘅交投做比較，發現科創板當日總交易額只有182億元（人民幣‧下同），而創業板交易額最高嗰6家上市公司已經超過187億元。
無公司成交額逾10億
更慘嘅係，科創板261家公司，有173家當日成交不足5000萬元，佔比高達66%。而且科創板無一家公司成交額超10億，最好嗰隻中芯國際只有8.8億元，比起創業板成交額最高、達到45.58億元嘅寧德時代，兩者差距接近6倍。
小琴好奇嘅係，近排不斷有傳中證監有意整頓科創板，呢個時候出現呢類文篇，唔知係咪提前造勢呢？