明報APP
報章內容
必瘦站開生髮診所股價即彈
【明報專訊】新冠疫情仍未遏止，美容業被迫關閉幾十日無生意做。不過近日限聚令終於放寬，醫學美容股必瘦站（1830）即趁勢公布，喺香港開設最大型嘅生髮專科診所，佔地仲成8502平方呎。由醫學美容撈過界搞埋生髮嘅消息一出，必瘦站股價亦彈起近4.8%，收報4.84元，股東即時收新年利市啦，真係可以學曾江講句「恭喜髮財，恭喜大家髮財」！
今次開埋生髮專科診所，必瘦站話係反映集團擴展其醫療服務嘅策略，亦積極喺澳洲、新加坡同中國內地物色地方拓展生髮專科診所商機。而小琴記得必瘦站唔係第一次公布想搞生髮專科診所，公司主席兼執行董事歐陽江舊年已事先張揚，話集團會加快部署海外市場，仲話會拓展生髮業務及男士醫美業務，塑造一站式醫療及美容服務平台。必瘦站除了想男女（荷包）通殺外，歐陽江仲有意疫市擴張，話疫情令租金受壓，帶來逆市擴張良機，必瘦站已乘勢將服務網絡延伸至本地民生區，拓闊客戶基礎，包括在元朗開設旗艦服務中心，似乎疫市都唔一定要保守行事喎。