明報APP
報章內容
迪士尼公關大員蔡少綿轉戰港鐵
【明報專訊】港鐵（0066）近年經歷不少風浪，公司噚日就公布，搵咗迪士尼樂園前公關大員蔡少綿（Linda）加盟，接替剛剛跳槽到金管局嘅蘇家碧，接任港鐵公司事務總監。佢同前任有一大共通點，就係兩個人都曾經做過政務主任（AO），不同嘅係，Linda喺加入政府前曾經做過傳媒，小琴就希望，佢上任可以加強港鐵同傳媒嘅溝通。
港鐵近年是非多多，沙中線建築工程出事、到過去半年就深陷社會運動漩渦，單單都係「豬頭骨」，今次蔡少綿加入，相信要處理嘅工作唔少。不過， Linda喺迪士尼時已負責過不少重要工作，包括協助籌措迪士尼探索家酒店嘅新貸款、擴建要過百億政府撥款。正所謂「重賞之下必有勇婦」，蔡少綿未來三年未計酬金年薪高達414萬元，比蘇家碧最後一年在任年薪400萬元高。蔡少綿喺加入政府之前曾經做過記者，短短6年間喺英文南華早報做過記者、中國新聞編輯同總採訪主任。