明報APP
報章內容
WeLab起中文名 用足7年時間
標籤：小琴密語
【明報專訊】金融科技公司WeLab喺2013年初成立後，至今接近7年，到日前終於起咗個中文名，叫做「匯立金融」。創辦人龍沛智噚日話，起中文名可以話係呢7年嚟最大嘅難題之一，仲講笑話如果生個仔要7年先起到名，都唔知點算。佢亦解釋，「匯立」係指「匯智聚能，立新而上」。
叫做「匯立金融」
講開起名，其實小琴覺得WeLab其中一項業務「淘新機」，呢個名起得幾好。
淘新機係向客戶租出智能手機、電腦、無人機甚至playstation等用品，龍沛智話，好多人一兩年就換一次手機，但蘋果、華為啲機都好貴，所以傾向選擇租機用，𠵱家淘新機已經喺內地有400萬註冊用戶。
對於香港市場，WeLab嚟緊嘅重頭戲當然係虛擬銀行，被問到近期香港示威事件有無影響到虛擬銀行嘅進度，WeLab虛擬銀行董事局主席陳家強話︰「唔係我哋受影響」。明晒﹗