明報APP
報章內容
陳德霖憶盈富上市 心泛漣漪
【明報專訊】示威持續咗幾個月，金管局總裁陳德霖日前第一次評論件事，就話「暴力事件破壞法治」。噚日佢撰文就更語重心長，佢話香港人多年來努力建設香港成為國際金融中心，這一切得來不易，值得大家珍惜和守護。
佢又指出，最近聽番陳百強首《漣漪》，諗起盈富基金（2800）當年嘅廣告畫面，而「今天的香港正處於漩渦的中心，我們會盤旋而下，還是如漣漪般借一圈圈水波最終將投石消弭於無形，重歸平靜，考驗的是香港人的集體智慧」。
之所以聽過呢首歌，係因為佢回想起盈富基金嘅誕生過程。佢分享一個小秘密，當日盈富上市要揀主題曲，將佢難倒，因為當時有鄧麗君《甜蜜蜜》同陳百強《漣漪》兩首選擇，金管局最後要組成「遴選委員會」，經過民主程序最終選出《漣漪》。
做埋呢個月嘅陳德霖，近一個月總共寫咗4篇《匯思》，遙想當年。噚日嗰篇就講到1998年亞洲金融風暴政府「入市難，退市更難」。當中不忘補一句，當年動用港府嘅外匯基金1180億元入市，成功擊退大鱷，但佢亦都感激時任國務院總理朱鎔基公開表示「只要香港有需要，中央政府會提供儲備，幫助對抗投機者」。