明報APP
報章內容
胡孟青登報向耀才道歉
標籤：小琴密語
【明報專訊】獨立股評人胡孟青（圖）2017年12月畀耀才入稟高院，話佢11月13日喺新城電台《開市直擊》講新股雷蛇（1337）暗盤價嘅言論失實，又提及耀才網站唔可以正常運作，耀才控告青姐涉嫌誹謗，要求賠償，最後青姐噚日喺《東方日報》同《信報》登咗半版道歉聲明。
事源當時青姐同拍擋講起，雷蛇喺耀才暗盤價達6元，但好多人都入唔到網站，相反輝立暗盤價僅4至5元，或屬正常價格。耀才入稟狀話當日有逾800位客人進行暗盤買賣，但青姐發布內容前未有同耀才核實，話佢有意圖同鹵莽發布資訊，危害耀才聲譽。青姐喺聲明承認，佢喺節目所講雷蛇喺耀才暗盤嘅買賣成交係假，以及當日有好多股民入唔到耀才暗盤嘅網站，全部都係虛構出嚟，同事實並唔符合。佢又承認，自己喺無真憑實據嘅情况下，向公眾蓄意發放虛假消息，以毀壞耀才名譽，向耀才同客人致以最誠懇嘅道歉。
email: piano@mingpao.com