立法會議員梁國雄（長毛）舊年聖誕應ViuTv邀請，同立法會前主席曾鈺成跟住矛盾去旅行。佢今朝喺電台節目中被市民問到如果喺今屆議員中選一個「矛盾對象」，佢會想同邊個去同埋去邊度？點知長毛咁答……
其他報道：【短片】曾鈺成拍片教英文 Merry Christmas咁樣讀……
長毛今朝出席港台節目《政壇新秀訓練班》，當然少不了又係講特首選舉。不過，最吸引全場起哄嘅，當然就唔係呢啲熟口熟面嘅問題啦。
一位現場觀眾話要問個輕鬆啲問題，提到長毛舊年聖誕同曾鈺成去波蘭旅行好開心，問佢如果畀佢揀，喺新一屆立法會中會揀邊個做「矛盾對象」去旅行？同埋會去邊度呢？問題未問完，全場已爆笑。
不過，長毛非常淡定又正經咁話，係好想去旅行，但今個聖誕好唔得閒，呢排又要打官司、好多嘢做，去唔到旅行啦，唔會諗住同邊個去旅行。
佢之後仲話，香港而家真係面臨好危急嘅局勢，直指覆巢之下豈有完卵，屋企火燭你唔會走咗去旅行嘛，但可能會抖一抖，例如去台灣玩兩日、見下朋友。
主持人話上次佢同曾鈺成去完旅行之後，對方都了解佢多咗，建議佢可以考慮同特首梁振英去，增加了解，但佢話自己同梁振英唯一相同只係姓梁，「唔會（同梁振英去）架啦」。
相關字詞﹕編輯推介